Gosha-e-zehan mai

bay rubt khialo’n kay hujoom

Chusm-e-tenhai say chun ker

wohi bay naam say ashk

Lamha-e-wasl kay us

aihad-e faramoshi ko

yaad kerta hai,

sisakta hai,

bilakta hai buhat

Aaj bhi dasht-e-musafat kay

Khatin rasto’n main,

jalti bhujti wohi

bay-naam rafaqat ki shuu’aa…..

Aariz-e-waqt ki surkhi

pay chalak perti hai,

Phir say milnay ki yah mohoom

talab aur tarap,

aaj bhi zehan kay gosho’n

mai chamak uth’ti hai.

Aaj bhi soch kay

angaar jazeeray main too,

Aankh kay noor mai too,

Dil kay sawairay main too,

Ajnabi shaam ki dum torti

barsaat mai too,

Hai lakeero’n ki terha sabt

meray haath mai too,

Meray hontoo’n ka tabassum,

Meray din raat main too

Hum kalaami ka koi waqiyaa

guzraa bhi nhi…………

phir bhi lagta hai kay

mojood hai her baat main too,

Mujh say waqif hi nhi teri tabyat lekin

Terz-e-inkaar main too,

Shewa-e-guftaar main too,

Too hi too hai meray atraaf ki

her shay main nihaa’n

Kabhi iqraar ka hasil

Kabhi inkaar main too,

Kabhi saaya………,

Kabhi sehra…........

Kabhi nazroo’n ka saraab

Kabhi shabnam…………,

Kabhi nighat…………..,

Kabhi rung-o-khushboo

Too meri neend,Mera khuwaab,

Meri subh-o-shaam,

Too musarrat,Too mera dukh,

Too mera sub kuch hai…!!

Too mera kuch bhi nhi’n….

Phir bhi mera sub kuch hai..

Too mera kuch bhi nhi’n….

Phir bhi Mera sub kuch hai………..!!!!!